Àlex Moga: “Era Lei d’Aran serà un cas unic en Euròpa, ei enes mans deth Parlament de Catalonha”

Alex Moga, baile de Vielha e Mijaran e deputat de CiU, a compareishut eth dijaus 25 de seteme ena Comissió d’Afers Institucionals deth Parlament de Catalonha e a defenut que “era naua lei de regim especiau d’Aran que s’elabòre serà un cas unic en Euròpa damb er emparament dera sua identitat, enes mans deth Parlament de Catalonha”.
Moga a assegurat qu’er emparament e es drets que proporcionarà era lei deth regim especiau dera Val d’Aran garantís “es objectius de progrès economic, sociau e culturau”.

Eth baile de Vielha a arrebrembat qu’era lei der an 1990 “siguec eth prumèr pas entà recuperar es institucions araneses, en tot èster era translacion deth Parlament d’arreconéisher ua nacionalitat laguens era nacion catalana”. Dempús de 24 ans e en actuau contèxt damb era elaboracion dera naua lei, Moga a soslinhat qu’era Generalitat “dotèc de capacitat politica ath Conselh Generau d’Aran”, en tot mostrà’c damb era gestion d’un pròpri sistèma sanitari “de manèra mès propèra e reau era foncion des besonhs deth territòri”.

Damb aguesta reconeishença, eth baile a assegurat qu’ara futura lei li cau perméter ua “Val d’Aran mès sostenible, damb melhores politiques e que donguen melhor responsa as demandes e tendéncies actuaus”. A compdar d’un punt d’enguarda economic, li cau comportar “ua melhora e major internacionalizacion, damb mès innovacion, mès infrastructures e melhor emparament naturau”. E des d’ua vision istorica e culturau, li cau méter “es mecanismes” entà que “era identitat culturau aranesa subervisque e en melhor cas potenciar-la e internacionalizar-la”.

Moga a acabat en tot concretar que “sense Catalonha non i a auanç dera realitat Occitana”, donques “mos la cau poder projectar ath mon a trauèrs deth sòn pròpri exemple”.