CiU presente 60 esmenes ara Lei d’Aran entà refortir ath eth sòn autogovèrn, melhorar eth finançament e enfortir era identidat.

Àlex Moga Secretari Generau de Convergéncia Aranesa, Deputat en Parlament Catalan e Alcalde de Vielha e Mijaran remèrque que se definís Aran coma ua “Autonomia politica” e assegure qu’ “aurà major capabilitat politica, identitària, economica e sociau entà garantir e definir un modèu pròpri sostenible e responsable ath laguens de Catalunya”

Eth grop  parlamentari de Convergéncia i Unió a presentat 60 esmenes ara prepausa de Lei de Regim Especiau d’Aran entà melhora tecnica e qualitativament era prepausa, en tan que “refòrcen er autogovèrn, establissen un sistèma de finançament estable e progressiu e enfortissen era identitat d’Aran”.  Alex Moga, deputat en Parlament, alcalde de Vielha e Secretari Generau de Convergéncia Democratica Aranesa- Partit Nacionaliste Aranés, a remercat “ a compdar d’ara, eth pòble aranés aurà major capabilitat politica, identitària, economica e sociau entà garantir e definir un modèu pròpri sostenible e responsable ath laguens de Catalunya”

Damb es nòstes esmenes, “auem trabalhat entà dotar a Aran des esturments de besonh entà afrontar eth present e era capabilitat entà definir un modèu pròpri que consolide er estat deth benèster, uns melhors servicis publics, un major progrés economic e toristic e auem consolidat e enfortit era identitat d’Aran e era sua projeccion ath mon en futur” a explicat Moga.

Coma dejà auancèc eth deputat, er objectiu ei “hèr d’Aran un cas unic en Euròpa e CiU i e compromés”.  De hèt, era federacion nacionalista a incorporat era major part des prepauses qu’autant era societat civila aranes (personalitats, entitas e institucions) auien hèt a arribar, atau coma es qu’es pròpris compareishents demanèren ara Comissió d’Afers Institucionals.

Proteccion ath dauant dera LRSAL

En aguest sens, damb aguestes esmenes se preten reforçar era singularitat d’Aran e la definís coma ua “autonomia politica”, quedant exclodida deth regim dera legislacion locau entà esvitar era aplicacion dera LRSAL e “esvitar era desaparicion dera maxima institucion aranesa que date de mès de 1000 ans”.

Ath delà, CiU presente un major marge d’autogovèrn en tot prepausar, ath marge des competéncies atribusides ara propòsta de Lei, híger competéncies coma “era recuperacion deth dret civiu aranés, era capabilitat de crear un sistèma de comunicación audiovisuau publica; eth reconeishement entara Accion Exteriora d’Aran; era capabilitat d’establir un modèu meteorologic influent; exclou Aran deth tèrme “comarca” e recupera era fegura deth “Proòm d’Aran”.

Moga tanben a remercat que se garantise “era participacion dera institucion aranesa ena definicion dera eraldica pròpria aranesa, definís era particularitat de Vielha coma caplòc d’Aran e consolide per Lei totes es compteéncies que li an estat transferides enquiara”.